0 
0 
સુરત શહેરમાં આંગડિયા પેઢીના વ્યવસાયની આડમાં લોકો સાથે છેતરપિંડી કરતી એક ટોળકીનો પર્દાફાશ થયો હતો. સરથાણા પોલીસે 12.50 લાખ રૂપિયાના મુદ્દામાલ સાથે આ ટોળકીના ત્રણ સભ્યોને ઝડપી પાડ્યા હતા. આ આરોપીઓ આંગડિયા પેઢીમાં પૈસા ટ્રાન્સફર કરવાના બહાને લોકો પાસેથી લાખો રૂપિયા પડાવી લેતા હતા. પોલીસે કિશોર ઘોડાદરા, કિરીટ પટેલ અને જયેશ કેરાસિયા નામના ત્રણ આરોપીઓની ધરપકડ કરી હતી. આ ત્રણેય આરોપીઓ સુરતના કતારગામ વિસ્તારના રહેવાસી છે અને દલાલીના કામ સાથે સંકળાયેલા હતા.
આરોપીઓ આંગડિયા પેઢીમાં RTGS દ્વારા પૈસા ટ્રાન્સફર કરાવવાના બહાને લોકોને ફસાવતા હતા. આ જ રીતે તેમણે એક ફરિયાદી પાસેથી 50 લાખ રૂપિયા RTGS કરવાના બહાને લીધા હતા. પરંતુ તેમણે પૈસા ટ્રાન્સફર કર્યા નહોતા. આ ઉપરાંત તેમણે આ કામ માટે ફરિયાદી પાસેથી 1 લાખ રૂપિયા કમિશન પેટે પણ લીધા હતા. આમ કુલ 51 લાખ રૂપિયાની છેતરપિંડી આ આરોપીઓએ સાથે મળીને કરી હતી. જ્યારે ફરિયાદીને પોતાની સાથે થયેલી છેતરપિંડીની જાણ થઈ ત્યારે તેમણે તાત્કાલિક સરથાણા પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે તપાસ શરૂ કરી અને આરોપીઓની ધરપકડ કરી હતી. પોલીસે આરોપીઓ પાસેથી 12,50,000 રૂપિયા રોકડા પણ જપ્ત કર્યા હતા. પોલીસ આ ત્રણેય આરોપીઓની વધુ પૂછપરછ કરી રહી છે કે તેમણે આ જ મોડસ ઓપરેન્ડીથી અન્ય કેટલા લોકોને છેતર્યા છે. આ ઘટના બાદ આંગડિયા પેઢી સાથે સંકળાયેલા વ્યવસાયીઓ અને ગ્રાહકોમાં સાવચેતીનો માહોલ જોવા મળ્યો હતો. પોલીસે લોકોને આવા શખ્સોથી સાવધાન રહેવા અને કોઈપણ વ્યવહાર કરતા પહેલા તેની ખરાઈ કરવા અપીલ કરી હતી.
Editor & Chief – VIMAL PARMAR (PrimeNetworkNews)
About the Author
